தற்போது, பல புள்ளி தொடு (Multipoint Touch) திரை கைபேசிகளும், பலகை மற்றும் மடிக்கணினிகளும் குறைந்த விலையில் உபயோகத்திற்கு வந்துவிட்டன. பார்வை குறைபாடுடையவர்கள் பெரும்பாலும் விசைப்பலகை உள்ள கைபேசிகளைப் பயன்படுதினாலும், தொடுதிரை உள்ள கைபேசிகளை பயன்படுத்தவும் ஆரம்பித்து விட்டார்கள். பலபுள்ளி தொடுதிரை வசதியினை மென்தமிழ் ப்ரெய்ல் குறியீடுகளுடன் இணைத்து தொடுதல் மூலமாக மென்தமிழ் குறியீடுகளை உள்ளீடு செய்யும் ஒரு ப்ரெய்ல் உரை தொகுப்பாக்கி (Braille Text Editor) மென்பொருளுக்கான வரைவு கீழே தரப்பட்டுள்ளது.

            மென்தமிழ் ப்ரெய்லினை தொடுதிரையில் தட்டிட தொடுதிரையை கீழ்க்கண்டவாறு பிரிக்கவேண்டும். இடமேல் மூலையை இடது கை பெருவிரலுக்கும், கீழ் பகுதியை வலது கை பெருவிரலுக்கும் பிரித்து மீதமுள்ள பெரும்பாலான இடங்களை வலது கையின் மற்ற நான்கு விரல்களுக்கும் என்று நிச்சயித்துக்கொண்டு, கீழ்க்கண்ட செயல்கள் மூலமாக ப்ரெய்லினை அச்சிடலாம். ஒவ்வொரு எழுத்துக்கும் இரண்டு முறை திரையை தட்டவேண்டும். முதல் முறை தட்டும் போது 1, 2, 3 மற்றும் 7 ம் புள்ளிகளும், இரண்டாம் முறை தட்டும்போது 4, 5, 6 மற்றும் 8 ம் புள்ளிகளும் அச்சிடப்படும். இதற்கென்று தனியாக ப்ரெய்ல் குறியீடுகளுடன் நமக்கு தேவையான நான்கு புள்ளி குறியீடுகள் கொண்ட எழுத்துரு ஒன்று உருவாக்கியுள்ளேன். வலது கை 1, 2, 3 மற்றும் 4, 5, 6 புள்ளிகளை முடிவு செய்கிறது. இடது கை பெருவிரல் 7 மற்றும் 8 புள்ளிகளை முடிவு செய்கிறது. ஒவ்வொரு முறை ஒரு முழு எழுத்து தட்டப்படும் போதும் அந்த எழுத்து பேசப்பட (வாசிக்கப்பட) வேண்டும். ஒவ்வொரு சொல்லுக்கும் பிறகும் அச்சொல் பேசப்படவேண்டும்.